Kaulaussaium – Weihos Bokos


Codex Ambrosianus B based on transcription by Project Wulfila, in turn based on Streitberg (1919). Commercial use limited. Punctuation and extratextual conventions differ from the manuscript. Verse 29 according to Codex Ambrosianus A. Latin Wulfilan
1-2
3-8	· · · in sunjai · Swaswe ganemuþ at Aipafrin þamma liubin gaskalkja unsaramma saei ïst triggws faur ïzwis andbahts xristaus Ïesuis · Saei jah gakannida uns ïzyara friaþwa ïn ahmin :
9-13	Duþþe jah weis fram þamma daga ei hausidedum ni ƕeilaidedum faur ïzwis bidjandans jah aihtrondans ei fullnaiþ kunþjis wiljins ïs · Ïn allai handugein jah frodein ahmeinai ei gaggaiþ wairþaba fraujins · Ïn allamma þatei galeikai · Ïn allamma waurstwe godaize akran bairandans jah wahsjandans ïn ufkunþja Gudis · Ïn allai mahtai gaswinþidai bi mahtai wulþaus ïs · Ïn allai usþulainai jah usbeisnai miþ fahedai awiliudondans Attin · Saei laþoda ïzwis du dailai hlautis weihaize ïn liuhada · Saei galausida ïzwis us waldufnja riqizis jah atnam ïn þiudangardja sunaus friaþwos seinaizos :
14-18a	Ïn þammei habam faurbauht fralet frawaurhte · Saei ïst frisahts Gudis ungasaiƕanis frumabaur allaizos gaskaftais · Unte ïn ïmma gaskapana waurþun alla ïn himinam jah ana airþai · þo gasaiƕanona jah þo ungasaiƕanona · Jaþþe sitlos jaþþe fraujinassjus · Jaþþe reikja jaþþe waldufnja · Alla þairh ïna jah ïn ïmma gaskapana sind · Jah ïs ïst faura allaim jah alla ïn ïmma ussatida sind jah ïs ïst haubiþ leikis aikklesjons :
18b-20	Saei ïst anastodeins frumabaur us dauþaim ei sijai ïn allaim ïs frumadein habands unte ïn ïmma galeikaida alla fullon bauan · Jah þairh ïna gafriþon alla ïn ïmma gawairþi taujands þairh bloþ galgins ïs þairh ïna jaþþe þo ana airþai jaþþe þo ana himinam :
21-24	Jah ïzwis simle wisandans framaþidans jah fijands gahugdai ïn waurstwam ubilaim ïþ nu gafriþodai ïn leika mammons ïs þairh dauþu du atsatjan ïzwis weihans jah unwammans jah usfairinans faura ïmma · Jabai sweþauh þairhwisiþ ïn galaubeinai gaþwastidai jah gatulgidai jah ni afwagidai af wenai aiwaggeljons þoei hausideduþ sei merida ïst ïn alla gaskaft þo uf himina · þizozei warþ ïk Pawlus andbahts saei nu fagino ïn þaimei winna faur izwis jah usfullja gaidwa aglono Xristaus ïn leika meinamma faur leik ïs þatei ïst aikklesjo :
25-27	þizozei warþ ïk andbahts bi ragina Gudis þatei giban ïst mis ïn ïzwis du usfulljan waurd Gudis · Runa sei gafulgina was fram aiwam jah fram aldim ïþ nu gaswikunþida warþ þaim weiham ïs · þaimei wilda Guþ gakannjan gabein wulþaus þizos runos ïn þiudom þatei ïst Xristus ïn ïzwis wens wulþaus :
28-29	þanei weis gateiham talzjandans all manne jah laisjandans all manne ïn allai handugein ei atsatjaima all manne fullawitan ïn xristau Ïesu · Du þammei arbaidja usdaudjands bi waurstwa sei ïnna uswaurkeiþ ïn mis ïn mahtai · · ·
?



8-12	· · · frawaurhte leikis ïn bimaita Xristaus · Miþ ganawistrodai ïmma ïn daupeinai ïn þizaiei jah miþurrisuþ þairh galaubein waurstwis Gudis saei urraisida ïna us dauþaim :
13-15	Jah ïzwis dauþans wisandans missadedim jah unbimaita leikis ïzwaris miþgaqiwida miþ ïmma fragibands uns allos missadedins · Afswairbands þos ana uns wadjabokos raginam seinaim þatei was andaneiþo uns jah þata usnam us midumai ganagljands ïta du galgin andhamonds sik leika reikja jah waldufnja gatarhida balþaba gablauþjands þo bairhtaba ïn sis :
16-17	Ni manna nu ïzwis bidomjai ïn mata aiþþau ïn draggka aiþþau ïn dailai dagis dulþais aiþþau fulliþe aiþþau sabbatum · þatei ïst skadus þize anawairþane ïþ leik Xristaus :
18-19	Ni ƕashun ïzwis gajiukai wiljands ïn hauneinai jah blotinassau aggile þatei ni saƕ ushafjands sik sware ufblesans fram fraþja leikis seinis jah ni habands haubiþ us þammei all leik þairh gawissins jah gabindos auknando jah þeihando wahseiþ du wahstau Gudis :
20-22	Jabai gaswultuþ miþ Xristau af stabim þis fairƕaus · Ƕa þanaseiþs swe qiwai ïn þamma fairƕau urrediþ·· Ni teikais ni atsnarpjais ni kausjais · þatei ïst all du riurein þairh þatei ïs brukjaidau bi anabusnim jah laiseinim manne þoei sind sweþauh waurd habandona handugeins þuhtaus ïn fastubnja jah hauneinai hairtins jah unfreideinai leikis ni ïn sweriþo ƕizai du soþa leikis :
Γ
1	Jabai nu miþurrisuþ Xristau þoei ïupa sind sokeiþ þarei Xristus ïst ïn taihswai Gudis sitands :
2-4	þaimei ïupa sind fraþjaiþ ni þaim þoei ana airþai sind · Unte gadauþnodeduþ jah libains ïzwara gafulgina ïst miþ Xristau ïn Guda · þan Xristus swikunþs wairþiþ libains ïzwara þanuh jah jus bairhtai wairþiþ miþ ïmma ïn wulþau :
5-7	Dauþeiþ nu liþuns ïzwarans þans þaiei sind ana airþai horinassu unhrainein winnon lustu ubilana jah faihugeiron sei ïst galiugagude skalkinassus · þairh þoei qimiþ hatis Gudis ana sunum ungalaubeinais · Ïn þaimei jah jus ïddjeduþ simle þan libaideduþ ïn þaim :
8-11	Ïþ nu aflagjiþ jah jus þo alla hatis þwairhein unselein anaqiss aglaitiwaurdein us munþa ïzwaramma ni usgaggai ni liugaiþ ïzwis misso afslaupjandans ïzwis þana fairnjan mannan miþ tojam ïs jah gahamoþ niujamma þamma ananiwidin du ufkunþja bi frisahtai þis saei gaskop ïna þarei nist Kreks jah Judaius bimait jah faurafilli Barbarus jah Skwþus skalks jah freis ak alla jah ïn allaim Xristus :
12-13	Gahamoþ ïzwis nu swe gawalidai Gudis weihans jah walisans brusts bleiþeins armahairtein selein haunein ahins qairrein usbeisnein þulandans ïzwis misso jah fragibandans silbans jabai ƕas wiþra ƕana habai fairina swaswe jah Xristus fragaf ïzwis swa jah jus taujaiþ :
14	Aþþan ufar alla friaþwa sei ïst gabindi ainamundiþos :
15-17	Jah gawairþi Gudis swignjaiþ ïn hairtam ïzwaraim ïn þammei jah laþodai wesuþ ïn ainamma leika jah awiliudondans wairþaiþ · Waurd Xristaus bauai ïn ïzwis gabigaba ïn allai handugein jah frodein ahmeinai laisjandans jah talzjandans ïzwis silbans psalmom hazeinim saggwim ahmeinaim ïn anstai siggwandans ïn hairtam ïzwaraim fraujin · All þisƕah þatei taujaiþ ïn waurda aiþþau ïn waurstwa all ïn namin fraujins Ïesuis awiliudondans Guda attin þairh ïna :
18	Jus qinons ufhausjaiþ wairam ïzwaraim swe gaqimiþ ïn fraujin :
19	Wairos frijoþ qenins ïzwaros jah ni sijaiþ baitrai wiþra þos :
20	Barna ufhausjaiþ fadreinam bi all unte þata waila galeikaiþ ïst ïn fraujin :
21	Jus attans ni gramjaiþ barna ïzwara du þwairhein ei ni wairþaina ïn unlustau :
22-25	þewisa ufhausjaiþ bi all þaim bi leika fraujam ni ïn augam skalkinondans swe mannam samjandans ak ïn ainfalþein hairtins ogandans Guþ · þisƕah þatei taujaiþ us saiwalai waurkjaiþ swe fraujin ni mannam witandans þatei af fraujin nimiþ andalauni arbjis · Unte fraujin Xristau skalkinoþ · Sa auk skaþaila andnimiþ þatei skoþ jah nist wiljahalþein at guda :
?1	Jus fraujans garaiht jah ïbnassu þewisam atkunnaiþ witandans þatei aihuþ jah jus fraujan ïn himinam :
?
2-4	Bidai haftjandans ïzwis wakandans ïn ïzai ïn awiliudam · Bidjandans samana jah bi uns ei guþ uslukai unsis haurd waurdis du rodjan runa Xristaus ïn þizozei jah gabundans ïm ei gabairhtjau þo swaswe skuljau rodjan :
5-6	Ïn handugein gaggaiþ du þaim uta þata mel usbugjandans · Waurd ïzwar sinteino ïn anstai salta gasupoþ siai ei witeiþ ƕaiwa skuleiþ ainƕarjammeh andhafjan :
7-9	þatei bi mik ïst all gakanneiþ ïzwis Twkekus sa liuba broþar jah triggwa andbahts jah gaskalki ïn fraujin · þanei ïnsandida du ïzwis duþþe ei kunnjai ƕa bi ïzwis ïst jah gaþrafstjai hairtona ïzwara · Miþ Aunisimau þamma liubin jah triggwin broþr saei ïst us ïzwis þaiei all ïzwis gakannjand þatei her ïst :
10-17	Goleiþ ïzwis Areistarkus sa miþfrahunþana mis jah Markus gadiliggs Barnabins bi þanei nemuþ anabusnins ei jabai qimai at ïzwis andnimaiþ ïna jah Ïesus saei haitada Justus · þaiei sind us bimaita þai ainai gawaurstwans sind þiudangardjos Gudis þaiei wesun mis du gaþrafsteinai · Goleiþ ïzwis Aipafras sa us ïzwis skalks xristaus Ïesuis sinteino usdaudjands bi ïzwis ïn bidom ei standaiþ allawaurstwans jah fullawitans ïn allamma wiljin Gudis · Weitwodja auk ïmma þatei habaiþ manag aljan bi ïzwis jah bi þans þaiei sind ïn Laudeikaia jah Ïairaupaulein · Goleiþ ïzwis Lukas leikeis sa liuba · Goleiþ þans ïn Laudeikaia broþruns jah Nwmfan jah þo ïngardjon ïs aikklesjon · Jah þan ussiggwaidau at ïzwis so aipistaule · Taujaiþ ei jah ïn Laudekaion aikklesjon ussiggwaidau jah þoei ïst us Laudeikaion jus ussiggwaid · Jah qiþaiþ Arkippau saiƕ þata andbahti þatei andnamt ïn fraujin ei ïta usfulljais :
18a	Goleins meinai handau Pawlaus :
18b	Gamuneiþ meinaizos bandjos · Ansts miþ ïzwis · Amen :

Leave a Reply Cancel reply