| Codex Ambrosianus B, based on transcription by Project Wulfila, in turn based on Streitberg (1919). Commercial use limited. Punctuation and extratextual conventions differ from the manuscript. |
|
| 1–2 | Pawlus apaustaulus Ïesuis Xristaus þairh wiljan gudis jah Teimauþaius broþar aikklesjon gudis þizai wisandein ïn Kaurinþon miþ allaim þaim weiham þaim wisandam ïn allai Akaïjai · Ansts ïzwis jah gawairþi fram Guda attin unsaramma jah fraujin Ïesu xristau : |
| 3–4 | Þiuþiþs Guþ jah atta fraujins unsaris Ïesuis xristaus atta bleiþeino jah guþ allaizo gaþlaihte saei gaþrafstida uns ana allai aglon unsarai ei mageima weis gaþrafstjan þans ïn allaim aglom þairh þo gaþlaiht þizaiei gaþrafstidai sijum silbans fram Guda · |
| 5 | Unte swaswe ufarassus ïst þulaine xristaus ïn uns swa jah þairh xristu ufar filu ïst jah gaþrafsteins unsara · |
| 6–7 | Aþþan jaþþe þreihanda ïn ïzwaraizos gaþlaihtais jah naseinais þizos waurstweigons ïn stiwitja þizo samono þulaine þozei jah weis winnam · Jah wens unsara gatulgida faur ïzwis jaþþe gaþrafstjanda ïn ïzwaraizos gaþlaihtais jah naseinais witandans þatei swaswe gadailans þulaine sijuþ jah gaþlaihtais wairþiþ : |
| 8–9 | Unte ni wileima ïzwis unweisans broþrjus bi aglon unsara þo waurþanon uns ïn Asiai unte ufarassau kauridai wesum ufar maht swaswe skamaidedeina uns jah liban · Akei silbans ïn uns silbam andahaft dauþaus habaidedum ei ni sijaima trauandans du uns silbam ak du guda þamma urraisjandin dauþans · |
| 10–11 | Ïzei us swaleikaim dauþum uns galausida jah galauseiþ du þammei wenidedum ei galauseiþ at hilpandam jah ïzwis bi uns bidai ei ïn managamma andwairþja so ïn uns giba þairh managans awiliudodau faur uns · |
| 12–14 | Unte ƕoftuli unsara so ïst weitwodei miþwisseins unsaraizos þatei ïn ainfalþein jah hlutrein gudis ni ïn handugein leikeinai ak ïn anstai gudis usmeitum ïn þamma fairƕau ïþ ufarassau at ïzwis · Unte ni alja meljam ïzwis alja þoei anakunnaiþ aiþþau jah ufkunnaiþ aþþan wenja ei und andi ufkunnaiþ swaswe gakunnaideduþ uns bi sumata unte ƕoftuli ïzwara sijum, swaswe jah jus unsara ïn daga fraujins Ïesuis xristaus · |
| 15–16 | Jah þizai trauainai wilda faurþis qiman at ïzwis ei anþara anst habaidedeiþ jah þairh ïzwis galeiþan ïn Makidonja jah aftra af Makidonjai qiman at ïzwis jah fram ïzwis gasandjan mik ïn Ïudaia · |
| 17 | Þatuþ þan nu mitonds ïbai aufto leihtis bruhta·· Aiþþau þatei mito bi leika þagkjau ei ni sijai at mis þata ja ja jah þata ne ne·· |
| 18 | Aþþan triggws Guþ ei þata waurd unsar þata du ïzwis nist ja jah ne · |
| 19 | Unte Gudis sunus Ïesus xristus saei ïn ïzwis þairh uns wailamerjada þairh mik jah Silbanu jah Teimauþaiu nih warþ ja jah ne ak ja ïn ïmma warþ · |
| 20–22 | Ƕaiwa managa gahaita gudis ïn ïmma þata ja duþþe jah þairh ïna amen Guda du wulþau þairh uns · Aþþan sa gaþwastjands unsis miþ ïzwis ïn xristau jah salbonds uns guþ jah sigljands uns jah gibands wadi ahman ïn hairtona unsara · |
| 23–24 | Aþþan ïk weitwod Guþ anahaita ana meinai saiwalai ei freidjands ïzwara þanaseiþs ni qam ïn Kaurinþon · Ni þatei fraujinoma ïzwarai galaubeinai ak gawaurstwans sijum anstais ïzwaraizos unte galaubeinai gastoþuþ · |
| 𐌱 | |
| 1–3 | Aþþan gastauida þata silbo at mis ei aftra ïn saurgai ni qimau at ïzwis unte jabai ïk gaurja ïzwis jah ƕas ïst saei gailjai mik nibai sa gaurida us mis·· Jah þata silbo gamelida ïzwis ei qimands saurga ni habau fram þaimei skulda faginon gatrauands ïn allaim ïzwis þatei meina faheds allaize ïzwara ïst · |
| 4 | Aþþan us managai aglon jah aggwiþai hairtins gamelida ïzwis þairh managa tagra ni þeei saurgaiþ ak ei friaþwa kunneiþ þoei haba ufarassau du ïzwis · |
| 5–7 | Aþþan jabai ƕas gaurida ni mik gaurida ak bi sum ain ei ni anakaurjau allans ïzwis · Ganah þamma swaleikamma andabeit þata fram managizam swaei þata andaneiþo ïzwis mais fragiban jah gaþlaihan ïbai aufto managizein saurgai gasiggqai sa swaleiks · |
| 8 | Ïnuh þis bidja ïzwis tulgjan ïn ïmma friaþwa · |
| 9–11 | Duþþe gamelida ei ufkunnau kustu ïzwarana sijaidu ïn allamma ufhausjandans aþþan þammei ƕa fragibiþ jah ïk jah þan ïk jabai ƕa fragiba fragiba ïn ïzwara ïn andwairþja xristaus ei ni gaaiginondau fram Satanin unte ni sijum unwitandans munins ïs : |
| 12–13 | Aþþan qimands in̈ Trauadai ïn aiwaggeljon xristaus jah at haurdai mis uslukanai ïn fraujin ni habaida gaƕeilain ahmin meinamma ïn þammei ni bigat Teitaun broþar meinana ak twistandands ïmma galaiþ ïn Makidonja · |
| 14 | Aþþan Guda awiliud þamma sinteino ustaiknjandin hroþeigans uns ïn xristau jah daun kunþjis seinis gabairhtjandin ïn allaim stadim þairh uns · |
| 15–16a | Unte xristaus dauns sijum woþi Guda ïn þaim ganisandam jah ïn þaim fraqistnandam · Sumaim auk dauns dauþaus du dauþau sumaimuþ þan dauns us libainai du libainai · |
| 16b | Jah du þamma ƕas wairþs·· |
| 17 | Unte ni sijum sumai maidjandans waurd Gudis ak us hlutriþai ak swaswe us guda ïn andwairþja gudis ïn xristau rodjam · |
| 𐌲 | |
| 1 | Duginnam aftra uns silbans anafilhan·· Aiþþau ïbai þaurbum swe sumai anafilhis boko du ïzwis aiþþau us ïzwis anafilhis·· |
| 2–3 | Aipistaule unsara jus sijuþ gamelida ïn hairtam unsaraim kunþa jah anakunnaida fram allaim mannam · Swikunþ þatei sijuþ aipistaule xristaus andbahtida fram uns ïnna gamelida ni swartizla ak ahmin gudis libandins ni ïn spildom staineinaim ak ïn spildom hairtane leikeinaim · |
| 4–6 | Aþþan trauain swaleika habam þairh xristu du Gudani þatei wairþai sijaima þagkjan ƕa af uns silbam swaswe af uns silbam ak so wairþida unsara us Guda ïst ïzei jah wairþans brahta uns andbahtans niujaizos triggwos ni bokos ak ahmins · Unte boka usqimiþ ïþ ahma gaqiujiþ · |
| 7–8 | Aþþan jabai andbahti dauþaus ïn gameleinim gafrisahtiþ ïn stainam warþ wulþag swaei ni mahtedeina sunjus Ïsraelis fairweitjan du wlita Mosezis ïn wulþaus wlitis ïs þis gataurnandins ƕaiwa nei mais andbahti ahmins wairþai ïn wulþau·· |
| 9–11 | Jabai auk andbahti wargiþos wulþus und filu mais ufarist andbahti garaihteins us wulþau unte ni was wulþag þata wulþago ïn þizai halbai ïn ufarassaus wulþaus jabai auk þata gataurnando þairh wulþu und filu mais þata wisando ïn wulþau · |
| 12–13 | Habandans nu swaleika wen managaizos balþeins brukjaima jah ni swaswe Mosez lagida hulistr ana andawleizn duþe ei ni fairweitidedeina sunjus Ïsraelis ïn andi þis gataurnandins · |
| 14–15 | Ak afdaubnodedun fraþja ïze unte und hina dag þata samo hulistr ïn anakunnainai þizos fairnjons triggwos wisiþ unandhuliþ unte ïn xristau gatairada akei und hina dag miþþanei siggwada Moses hulistr ligiþ ana hairtin ïze · |
| 16–18 | Aþþan miþþanei gawandeiþ du fraujin afnimada þata hulistr aþþan frauja ahma ïst aþþan þarei ahma fraujins þaruh freihals ïst aþþan weis allai andhulidamma andwairþja wulþu fraujins þairhsaiƕandans þo samon frisaht ïngaleikonda af wulþau ïn wulþau swaswe af fraujins ahmin : |
| 𐌳 | |
| 1–2 | Duþþe habandans þata andbahti swaswe gaarmaidai waurþum ni wairþaima usgrudjans ak afstoþum þaim analaugnjam aiwiskjis ni gaggandans ïn warein nih galiug taujandans waurd gudis ak bairhtein sunjos ustaiknjandans uns silbans du allaim miþwisseim manne ïn andwairþja Gudis · |
| 3–4 | Aþþan jabai ïst gahulida aiwaggeljo unsara ïn þaim fralusnandam ïst gahulida ïn þaimei guþ þis aiwis gablindida fraþja þize ungalaubjandane ei ni liuhtjai ïm liuhadein aiwaggeljons wulþaus xristaus saei ïst frisahts Gudis ungasaiƕanis · |
| 5-7 | Aþþan ni uns silbans merjam ak Ïesu xristu fraujan ïþ uns skalkans ïzwarans ïn Ïesuis · Unte guþ saei qaþ ur riqiza liuhaþ skeinan saei jah liuhtida ïn hairtam unsaraim du liuhadein kunþjis wulþaus gudis ïn andwairþja Ïesuis xristaus · Aþþan habandans þata huzd ïn airþeinaim kasam ei ufarassus sijai mahtais Gudis jah ni us unsis · |
| 8-12 | Ïn allamma þraihanai akei ni gaaggwidai · andbitanai akei ni afslauþidai · wrikanai akei ni biliþanai · gadrausidai akei ni fraqistidai · sinteino dauþein fraujins Ïesuis ana leika unsaramma uskunþa sijai sinteino weis libandans ïn dauþu atgibanda ïn Ïesuis ei jah libains Ïesuis swikunþa wairþai ïn riurjamma leika unsaramma swaei nu dauþus ïn uns waurkeiþ ïþ libains ïn ïzwis · |
| 13-14 | Habandans nu þana saman ahman galaubeinais bi þamma gamelidin Galaubida ïn þizei jah rodida · Jah weis galaubjam ïn þizei jah rodjam · Witandans þatei sa urraisjands fraujan Ïesu jah unsis þairh Ïesu urraiseiþ jah fauragasatjiþ miþ ïzwis · |
| 15-18 | Þatuh þan allata ïn ïzwara ei ansts managnandei þairh managizans awiliud ufarassjai du wulþau Guda ïnuh þis ni wairþam usgrudjans akei þauhjabai sa utana unsar manna frawardjada aiþþau sa ïnnuma ananiujada daga jah daga · Unte þata andwairþo ƕeilaƕairb jah leiht aglons unsaraizos bi ufarassau aiweinis wulþaus kaurein waurkjada unsis ni fairweitjandam þize gasaiƕanane ak þizei ungasaiƕanane unte þo gasaiƕanona riurja sind ïþ þo ungasaiƕanona aiweina : |
| 𐌴 | |
| 1-5 | Witum auk þatei jabai sa airþeina unsar gards þizos hleiþros gatairada ei gatimrjon us guda habam gard unhanduwaurhtana aiweinana ïn himinam · Unte jah ïn þamma swogatjam bauainai unsarai þizai us himina ufarhamon gairnjandans jabai sweþauh jah gawasidai ni naqadai bigitaindau · Jah auk wisandans ïn þizai hleiþrai swogatjam kauridai ana þammei ni wileima afhamon ak anahamon ei fraslindaidau þata diwano fram libainai · Aþþan saei jah gamanwida uns du þamma guþ saei jah gaf unsis wadi ahman · |
| 6-10 | Gatrauandans nu sinteino jah witandans þatei wisandans ïn þamma leika afhaimjai sijum fram fraujin · Unte þairh galaubein gaggam ni þairh siun · Aþþan gatrauam jah waljam mais usleiþan us þamma leika jah anahaimjaim wisan at fraujin ïnuh þis usdaudjam jaþþe anahaimjai jaþþe afhaimjai waila galeikan ïmma unte allai weis ataugjan skuldai sijum faura stauastola xristaus ei ganimai ƕarjizuh þo swesona leikis afar þaimei gatawida jaþþe þiuþ jaþþe unþiuþ : |
| 11a | Witandans nu agis fraujins mannans fullaweisjam ïþ guda swikunþai sijum : |
| 11b-13 | Aþþan wenja jah ïn miþwisseim ïzwaraim swikunþans wisan uns ni ei aftra uns silbans uskannjaima ïzwis ak lew gibandans ïzwis ƕoftuljos fram uns ei habaiþ wiþra þans in andwairþja ƕopandans jah ni hairtin unte jaþþe usgeisnodedum guda jaþþe fullafraþjam ïzwis : |
| 14-16 | Unte friaþwa xristaus dishabaiþ uns domjandans þata þatei ains faur allans gaswalt þannu allai gaswultun · Jah faur allans gaswalt ei þai libandans ni þanaseiþs sis silbam libaina ak þamma faur sik gaswiltandin jah urreisandin · Swaei weis fram þamma nu ni ainnohun kunnum bi leika ïþ jabai ufkunþedum bi leika xristu akei nu ni þanaseiþs ni kunnum ïna : |
| 17-19 | Swaei jabai ƕo ïn xristau niuja gaskafts þo alþjona usliþun sai waurþun niuja alla · Aþþan alla us Guda þamma gafriþondin uns sis þairh xristu jah gibandin uns andbahti gafriþonais unte sweþauh guþ was ïn xristau manaseþ gafriþonds sis ni rahnjands ïm missadedins ïze jah lagjands ïn uns waurd gafriþonais : |
| 20-21 | Faur xristu nu airinom swe at Guda gaþlaihandin þairh uns bidjam faur xristu gagawairþnan Guda · Unte þana ïzei ni kunþa frawaurht faur uns gatawida frawaurht ei weis waurþeima garaihtei gudis ïn ïmma · |
| 𐌵 | |
| 1-2 | Gawaurstwans jah þan bidjandans ni swarei anst Gudis niman ïzwis · Mela · auk qiþiþ · Andanemjamma andhausida þus jah ïn daga naseinais gahalp þeina · Sai nu mel waila andnem · Sai nu dags naseinais : |
| 3-13 | Ni ainhun þannu ïn waihtai gibandans bistugqei ei ni anawammjaidau andbahti unsar ak ïn allamma ustaiknjandans uns swe gudis andbahtos ïn stiwitja managamma ïn aglom · Ïn nauþim · Ïn aggwiþom · Ïn slahim · Ïn karkarom · Ïn unsutjam · Ïn arbaidim · Ïn wokainim · Ïn lausqiþrein · Ïn swikniþai · Ïn kunþja · Ïn laggamodein · Ïn selein · Ïn ahmin weihamma · Ïn friaþwai unhindarweisai · Ïn waurda sunjos · Ïn mahtai gudis · Þairh wepna garaihteins taihswona jah hleidumona · Þairh wulþu jah unswerein · Þairh wajamerein jah wailamerein · Swe airzjandans jah sunjeinai · Swe unkunþai jah ufkunnaidai · Swe gaswiltandans jah sai libam · Swe talzidai jah ni afdauþidai · Swe saurgandans ïþ sinteino faginondans · Swe unledai ïþ managans gabigjandans swe ni waiht aihandans jah allata disnimandans · Munþs unsar usluknoda du ïzwis Kaurinþius hairto unsar us rumnoda · Ni þreihanda jus ïn uns ïþ þreihanda ïn hairþram ïzwaraim · Aþþan þata samo andalauni · Swe frastim qiþa · Urrumnaiþ jah jus : |
| 14-18 | Ni wairþaiþ gajukans ungalaubjandam unte ƕo dailo garaihtein miþ ungaraihtein aiþþau ƕo gamainduþe liuhada miþ riqiza·· Ƕouh þan samaqisse xristau miþ Bailiama aiþþau ƕo daile galaubjandin miþ ungalaubjandin·· Ƕouh þan samaqisse alhs gudis miþ galiugam·· Unte jus alhs gudis sijuþ libandins qiþiþ auk Guþ Þatei baua ïn ïm jah ïnna gagga jah wairþa ïze guþ jah eis wairþand mis managei ïnuh þis usgaggiþ us midumai ïze jah afskaidiþ ïzwis qiþiþ frauja jah unhrainjamma ni attekaiþ jah ïk andnima ïzwis jah wairþa ïzwis du attin jah jus wairþiþ mis du sunum jah dauhtrum qiþiþ frauja allwaldands : |
| 𐌶 | |
| 1 | Þo habandans nu gahaita liubans hrainjam unsis af allamma bisauleino leikis jah ahmins ustiuhandans weihiþa ïn agisa gudis · |
| 2-4 | Gamoteima ïn ïzwis · Ni ainummehun gaskoþum ni ainnohun frawardidedum ni ainnohun bifaihodedum ni du gawargeinai qiþa fauraqaþ auk þatei ïn hairtam unsaraim sijuþ du gaswiltan jah samana liban · Managa mis trauains du ïzwis managa mis ƕoftuli faur ïzwis usfulliþs ïm gaþlaihtais ufarfulliþs ïm fahedais ïn allaizos managons aglons unsaraizos : |
| 5-7 | Jah auk qimandam unsis ïn Makidonjai ni waiht habaida gaƕeilainais leik unsar ak ïn allamma anapragganai utana waihjons ïnnana agisa akei sa gaþlaihands hnaiwidaim gaþrafstida uns Guþ ïn quma Teitaus aþþan ni þatainei ïn quma ïs ak jah ïn gaþlaihtai þizaiei gaþrafstiþs was ana ïzwis gateihands uns ïzwara gairnein ïzwarana gaunoþu ïzwar aljan faur mik swaei mis mais faginon warþ : |
| 8-9 | Unte jabai gaurida ïzwis ïn þaim bokom ni ïdreigo mik jah jabai ïdreigoda · Gasaiƕa auk þatei so aipistaule jaina jabai du leitilai ƕeilai gaurida ïzwis · Nu fagino ni unte gauridai wesuþ ak unte gauridai wesuþ du ïdreigai saurgaideduþ auk bi guþ ei ïn waihtai ni gasleiþjaindau us unsis : |
| 10-13a | Unte so bi guþ saurga ïdreiga du ganistai gatulgidai ustiuhada ïþ þis fairƕaus saurga dauþu gasmiþoþ · Saiƕ auk silbo þata bi guþ saurgan ïzwis ƕelauda gatawida ïzwis usdaudein akei sunjon akei unwerein akei agis akei gairnein akei aljan akei fraweit · Ïn allamma ustaiknideduþ ïzwis hlutrans wisan þamma toja · Aþþan jabai melida ni ïn þis anamahtjandins ni ïn þis anamahtidins ak du gabairhtjan usdaudein unsara þoei faur ïzwis habam wiþra ïzwis ïn andwairþja Gudis · Ïnuh þis gaþrafstidai sium : |
| 13b-16 | Aþþan ana gaþrafsteinai unsarai filaus mais faginodedum ana fahedai Teitaus unte anaƕeilaiþs warþ ahma ïs fram allaim ïzwis unte jabai ƕa ïmma fram ïzwis ƕaiƕop ni gaaiwiskoþs warþ ak swaswe allata ïzwis ïn sunjai rodidedum swa jah ƕoftuli unsara so du Teitau sunja warþ · Jah brusts ïs ufarassau du ïzwis sind gamunandins þo allaize ïzwara ufhausein swe miþ agisa jah reirom andnemuþ ïna · Fagino nu unte ïn allamma gatraua ïn ïzwis : |
| 𐌷 | |
| 1-5 | Aþþan kannja ïzwis broþrjus anst Gudis þo gibanon ïn aikklesjon Makidonais þatei ïn managamma kustau aglons managduþs fahedais ïze jah þata diupo unledi ïze usmanagnoda du gabein ainfalþeins ïze unte bi mahtai weitwodja jah ufar maht silbawiljos wesun miþ managai usbloteinai bidjandans uns niman anst seina jah gamainein andbahtjis ïn þans weihans jah ni swaswe wenidedum ak sik silbans atgebun frumist fraujin þaþroh þan uns þairh wiljan gudis : |
| 6-7 | Swaei bedeima Teitaun ei swaswe faura dustodida swah ustiuhai ïn ïzwis jah þo anst akei swe raihtis ïn allamma managniþ galaubeinai jah waurda jah kunþja jah ïn allai usdaudein jah ana þizai us ïzwis ïn uns friaþwai ei jah ïn þizai anstai managnaiþ : |
| 8-11 | Ni swaswe fraujinonds qiþa ïzwis ak ïn þizos anþaraize usdaudeins jah ïzwaraizos friaþwos airkniþa kiusands unte kunnuþ anst fraujins unsaris Ïesuis xristaus þatei ïn ïzwara gaunledida sik gabigs wisands ei jus þamma ïs unledja gabeigai wairþaiþ · Jah ragin ïn þamma giba unte þata ïzwis batizo ïst juzei ni þatainei wiljan ak jah taujan dugunnuþ af fairnin jera · Ïþ nu sai jah taujan ustiuhaiþ ei swaswe fauraïst muns du wiljan swa jah du ustiuhan us þammei habaiþ · |
| 12-15 | Jabai auk wilja ïn gagreiftai ïst swaswe habai waila andanem ïst ni swaswe ni habai ni swa auk ei anþaraim ïusila ïþ ïzwis aglo ak us ïbnassau ïn þamma nu mela ïzwar ufarassus du jainaize þarbom ei jah jainaize ufarassus wairþai du ïzwaraim þarbom ei wairþai ïbnassus · Swaswe gameliþ ïst Saei filu ni managizo jah saei leitil ni fawizo : |
| 16-21 | Aþþan awiliud Guda ïzei gaf þo samon usdaudein faur ïzwis ïn hairto Teitaus unte raihtis bida andnam aþþan usdaudoza wisands silba wiljands galaiþ du ïzwis · Gaþ þan miþsandidedum ïmma broþar þizei hazeins ïn aiwaggeljon and allos aikklesjons · Aþþan ni þat ain ak jah gatewiþs fram aikklesjom miþ gasinþam uns miþ anstai þizai andbahtidon fram uns du fraujins wulþau jah gairnein unsarai · Biwandjandans þata ïbai ƕas uns fairinodedi ïn digrein þizai andbahtidon fram uns garedandans auk goda ni þatainei ïn andwairþja gudis ak jah ïn andwairþja manne : |
| 22-24 | Ïnsandidedum þan miþ ïm broþar unsarana þanei gakausidedum ïn managaim ufta usdaudana wisandan aþþan nu sai filaus mais usdaudozan trauainai managai ïn ïzwis · Jaþþe bi Teitu saei ïst gaman mein jah gawaurstwa ïn ïzwis jaþþe broþrjus unsarai apaustauleis aikklesjono wulþus xristaus · Aþþan ustaiknein friaþwos ïzwaraizos jah unsaraizos ƕoftuljos faur ïzwis ïn ïm ustaiknjandans ïn andwairþja aikklesjono : |
| 𐌸 | |
| 1-5 | Aþþan bi andbahti þatei rahtoda du weihaim ufjo mis ïst du meljan ïzwis unte wait gairnein ïzwara þizaiei fram ïzwis ƕopa at Makidonim unte Axaïa gamanwida ïst fram fairnin jera jah þata us ïzwis aljan gawagida þans managistans ïzei · Aþþan fauragasandida broþruns ei ƕoftuli unsara so fram ïzwis ni waurþi lausa ïn þizai halbai ei swaswe qaþ gamanwidai sijaiþ · Ïbai jabai qimand miþ mis Makidoneis jah bigitand ïzwis unmanwjans gaaiwiskondau weis · Ei ni qiþau jus · Ïn þamma stomin þizos ƕoftuljos · Naudiþaurft nu man bidjan broþruns ei galeiþaina du ïzwis jah fauragamanwjaina þana fauragahaitanan aiwlaugian ïzwarana þana manwjana wisan swaswe wailaqiss jah ni swaswe bifaihon : |
| 6-7 | Þatuþ þan saei saiiþ us gaþagkja us gaþagkja jah sneiþiþ jah saei saiiþ ïn þiuþeinai us þiuþeinai jah sneiþiþ · Ƕarjizuh swaswe fauragahugida hairtin ni us trigon aiþþau us nauþai unte hlasana giband frijoþ Guþ : |
| 8-9 | Aþþan mahteigs ïst Guþ alla anst ufarassjan ïn ïzwis ei ïn allamma sinteino allis ganauhan habandans ufarassjaiþ ïn allamma waurstwe godaize swaswe gameliþ ïst Tahida gaf unledaim uswaurts ïs wisiþ du aiwa : |
| 10-15 | Aþþan sa andstaldands fraiwa þana saiandan jah hlaiba du mata andstaldiþ jah managjai fraiw ïzwar jah wahsjan gataujai akrana uswaurhtais ïzwaraizos ïn allamma gabignandans ïn allai ainfalþein sei waurkeiþ þairh uns aiwxaristian Guda · Unte andbahti þis gudjinassaus ni þatainei ïst usfulljando gaidwa þize weihane ak jah ufarassjando þairh managa awiliuda Guda · Þairh gakust þis andbahtjis mikiljandans Guþ ana ufhauseinai andahaitis ïzwaris ïn aiwaggeljon xristaus jah ïn ainfalþein gamainduþais du ïm jah du allaim jah ïzei bidai faur ïzwis gairnjandans ïzwara ïn ufarassaus anstais Gudis ana ïzwis · Awiliud Guda ïn þizos unusspillodons ïs gibos : |
| I | |
| 1-2 | Aþþan ïk silba Pawlus bidja ïzwis bi qairrein jah mukamodein xristaus ïkei ana andaugi raihtis hauns ïm ïn ïzwis aþþan aljar wisands gatraua ïn ïzwis aþþan bidja ei ni andwairþs gatrauau trauainai þizaiei man gadaursan ana sumans þans munandans uns swe bi leika gaggandans : |
| 3-6 | Ïn leika auk gaggandans ni bi leika drauhtinom unte wepna unsaris drauhtinassaus ni leikeina ak mahteiga Guda du gataurþai tulgiþo mitonins gatairandans jah all hauhiþos ushafanaizos wiþra kunþi Gudis jah frahinþandans all fraþje jah ïn ufhausein xristaus tiuhandans jah manwuba habandans du fraweitan all ufarhauseino þan usfulljada ïzwara ufhauseins : |
| 7-11 | Þo bi andwairþja saiƕiþ · Jabai ƕas gatrauaiþ sik silban xristaus wisan þata þagkjai aftra af sis silbin ei swaswe ïs xristaus swa jah weis · Aþþan sweþauh jabai ƕa managizo ƕopam bi waldufni unsar þatei atgaf frauja unsis du timreinai jah ni du gataurþai ïzwarai ni gaaiwiskonda ei ni þugkjaima swe þlahsjandans ïzwis þairh bokos · Unte þos raihtis bokos qiþand Kaurjos sind jah swinþos ïþ qums leikis lasiws jah waurd frakunþ · Þata þagkjai sa swaleiks þatei ƕileikai sium waurda þairh bokos aljar wisandans swaleikai jah andwairþai waurstwa : |
| 12-18 | Unte ni gadaursum domjan unsis silbans aiþþau gadomjan uns du þaim sik silbans anafilhandam ak eis ïn sis silbam sik silbans mitandans jah gadomjandans sik silbans du sis silbam ni fraþjand · Ïþ weis ni ïnu mitaþ ƕopam akei bi mitaþ garaideinais þoei gamat unsis Guþ mitaþ fairrinnandein und jah ïzwis · Ni auk swaswe ni fairrinnandans und ïzwis ufarassau ufþanjam uns unte jah und ïzwis gasniumidedum ïn aiwaggeljon xristaus · Ni ïnu mitaþ ƕopandans ïn framaþjaim arbaidim aþþan wen habam at wahsjandein galaubeinai ïzwarai ïn ïzwis mikilnan bi garaideinai unsarai du ufarassau ufarjaina ïzwis aiwaggeljon merjan ni ïn framaþjaim arbaidim du manwjaim ƕopan · Aþþan sa ƕopands ïn fraujin ƕopai unte ni saei sik silban gaswikunþeiþ jains ïst gakusands ak þanei frauja gaswikunþeiþ : |
| ·I𐌰· | |
| 1 | Ei wainei usþulaidedeiþ meinaizos leitil ƕa unfrodeins akei jah usþulaiþ mik · |
| 2-4 | Unte aljanonds ïzwis Gudis aljana gawadjoda auk ïzwis ainamma waira mauja swikna du usgiban Xristau · Aþþan og ïbai aufto swaswe Waurms Aiwwan uslutoda filudeisein seinai riurja wairþaina fraþja ïzwara af ainfalþein jah swiknein þizai ïn Xristau jabai nu sa qimanda anþarana Ïesu mereiþ þanei weis ni meridedum aiþþau ahman anþarana nimiþ þanei ni nemuþ aiþþau aiwaggeljon anþara þoei ni andnemuþ waila usþulaideduþ : |
| 5-9 | Man auk ni waihtai mik minnizo gataujan þaim ufar mikil wisandam apaustaulum jabai unhrains ïm waurda akei ni kunþja aþþan ïn allamma gabairhtidai ïn allaim du ïzwis · Aiþþau ïbai frawaurht tawida mik silban haunjands ei jus ushauhjaindau unte arwjo Gudis aiwaggeljon merida ïzwis·· Anþaros aikklesjons birauboda nimands andawizn du ïzwaramma andbahtja jah wisands at ïzwis jah ushaista ni ainnohun kaurida · Unte þarbos meinos usfullidedun broþrjus qimandans af Makidonai jah ïn allaim unkaureinom ïzwis mik silban fastaida jah fasta : |
| 10-11 | Ïst sunja xristaus ïn mis unte so ƕoftuli ni faurdammjada ïn mis ïn landa Akaje · Ïn ƕis·· Unte ni frijo ïzwis·· Guþ wait : |
| 12-15 | Ïþ þatei tauja jah taujan haba ei usmaitau ïnilon þize wiljandane ïnilon ei ïn þammei ƕopand bigitaindau swaswe jah weis · Unte þai swaleikai galiugaapaustauleis waurstwjans hindarweisai gagaleikondans sik du apaustaulum xristaus jah nist sildaleik unte silba Satana gagaleikoþ sik aggillau liuhadis · Nist mikil jabai andbahtos ïs gagaleikond sik swe andbahtos garaihteins þizeei andeis wairþiþ bi waurstwam ïze : |
| 16-19 | Aftra qiþa ïbai ƕas mik muni unfrodana aiþþau waila þau swe unfrodana nimaiþ mik ei jah ïk leitil ƕa ƕopau · Þatei rodja ni rodja bi fraujan ak swe ïn unfrodein ïn þamma stomin þizos ƕoftuljos · Unte managai ƕopand bi leika jah ïk ƕopa unte azetaba usþulaiþ þans unwitans frodai wisandans : |
| 20 | Usþulaiþ jabai ƕas ïzwis gaþiwaiþ · Jabai ƕas fraïtiþ · Jabai ƕas usnimiþ · Jabai ƕas ïn arbaidai briggiþ · Jabai ƕas ïzwis ïn andawleizn slahiþ : |
| 21-27 | Bi unsweriþai qiþa swe þatei weis siukai weseima ïþ ïn þammei ƕe ƕas anananþeiþ · Ïn unfrodein qiþa · Gadars jah ïk · Haibraieis sind·· Jah ïk · Ïsraeleiteis sind·· Jah ïk · Fraiw Abrahamis sind·· Jah ïk · Andbahtos xristaus sind·· Swaswe unwita qiþa mais ïk ïn arbaidim managizeim · Ïn karkarom ufarassau · Ïn slahim ufarassau · Ïn dauþeinim ufta · Fram Ïudaium fimf sinþam fidwor tiguns ainamma wanans nam · Þrim sinþam wandum usbluggwans was · Ainamma sinþa stainiþs was · Þrim sinþam usfarþon gatawida us skipa · Naht jah dag in diupiþai was mareins · Ƕratodum ufta · Bireikeim aƕo · Bireikeim waidedjane · Bireikeim us kunja · Bireikeim us þiudom · Bireikeim ïn baurg · Bireikeim ïn auþidai · Bireikeim ïn marein · Bireikeim ïn galiugabroþrum · Aglom jah arbaidim ïn wokainim ufta · Ïn gredau jah þaurstein ïn lausqiþreim ufta · Ïn friusa jah naqadein : |
| 28-29 | Ïnuh þo afar þata arbaiþs meina seiteina saurga meina allaim aikklesjom · Ƕas siukiþ jah ni siukau·· Ƕas afmarzjada jah ïk ni tundnau·· |
| 30 | Jabai ƕopan skuld sijai þaim siukeins meinaizos ƕopau : |
| 31-33 | Guþ jah atta fraujins Ïesuis wait · Sa þiuþeiga du aiwam · Þatei ni liuga · Ïn Damaskon fauramaþleis þiudos Araitins þiudanis witaida baurg Damaskai gafahan mik wiljands jah þairh augadauro ïn snorjon athahans was and baurgswaddjau jah unþaþlauh handuns ïs : |
| ·I𐌱· | |
| 1 | Ƕopan binah akei ni batizo ïst jah þan qima ïn siunins jah andhuleinins fraujins : |
| 2-5 | Wait mannan ïn xristau faur jera fidwortaihun · Jaþþe ïn leika ni wait jaþþe ïnuh leik ni wait · Guþ wait · Frawulwanana þana swaleikana und þridjan himin · Jah wait þana swaleikana mannan · Jaþþe ïn leika jaþþe ïnuh leik nih wait · Guþ wait · Þatei frawulwans warþ ïn wagg jah hausida unqeþja waurda þoei ni skulda sind mann rodjan · Faur þana swaleikana ƕopa ïþ faur mik silban ni waiht ƕopa niba ïn unmahtim meinaim : |
| 6-7 | Aþþan jabai wiljau ƕopan ni sijau unwita unte sunja qiþa ïþ freidja ïbai ƕas ïn mis ƕa muni ufar þatei gasaiƕiþ aiþþau gahauseiþ ƕa us mis · Jah bi filusnai andhuleino ei ni ufarhafnau atgibana ïst mis hnuto leika meinamma · Aggilus Satanins · Ei mik kaupastedi ei ni ufarhugjau : |
| 8-10 | Bi þatei þrim sinþam fraujan baþ ei afstoþi af mis · Jah qaþ mis Ganah þuk ansts meina unte mahts ïn siukeim ustiuhada · Filu gabaurjaba nu mais ƕopa ïn siukeim meinaim ei ufarhleiþrjai ana mis mahts Xristaus · Ïn þizei mis galeikaiþ ïn siukeim ïn anamahtim ïn nauþim ïn wrekeim ïn þreihslam faur Xristu unte þan siuka þan mahteigs ïm : |
| 11-13 | Warþ unwita ƕopands jus mik gabaidideduþ aþþan ïk skulds was fram ïzwis gakannjan unte ni waihtai mins habaida þaim ufar filu apaustaulum jah jabai ni waihts ïm · Aiþþau sweþauh taikneis apaustaulaus gatawidos waurþun ïn ïzwis ïn allai þulainai taiknim jah fauratanjam jah mahtim · Ƕa auk ïst þize wanai weseiþ ufar anþaros aikklesjons nibai þatei ïk silba ni kaurida ïzwis·· Fragibiþ mis þata skaþis : |
| 14-15 | Sai þridjo þata manwus ïm qiman at ïzwis jah ni kaurja ïzwis unte ni sokja ïzwaros aihtins ak ïzwis · Ni auk skulun barna fadreinam huzdjan ak fadreina barnam · Aþþan ïk gabaurjaba fraqima jah fraqimada faur saiwalos ïzwaros sweþauh ei ufarassau ïzwis frijonds minz frijoda : |
| 16-17 | Aþþan sai nu ïk ni kaurida ïzwis ak wisands aufto listeigs hindarweisein ïzwis nam · Ïbai þairh ƕana þizeei ïnsandida du ïzwis bifaihoda ïzwis·· |
| 18 | Baþ Teitu jah miþinsandida ïmma broþar · Ïbai ƕa bifaihoda ïzwis Teitus·· Niu þamma samin ahmin ïddjedum·· Niu þaim samam laistim·· |
| 19-21 | Aftra þugkeiþ ïzwis ei sunjoma uns wiþra ïzwis·· Ïn andwairþja gudis ïn xristau rodjam þatuþ þan all liubans ïn ïzwaraizos gatimreinais · Unte og ïbai aufto qimands ni swaleikans swe wiljau bigitau ïzwis jah ïk bigitaidau ïzwis swaleiks swe ni wileiþ mik · Ïbai aufto þwairheins aljan jiukos bihaita birodeinos haifsteis drobnans ïbai aftra qimandan mik Guþ gahaunjai at ïzwis jah qaino managans þize faura frawaurkjandane jah ni ïdreigondane ana unhrainiþai þoei gatawidedun horinassau jah aglaitein : |
| ·I𐌲· | |
| 1 | Þridjo þata qima at ïzwis · Ana munþa twaddje weitwode jah þrije gastandai all waurde : |
| 2-4a | Fauraqaþ jah aftra fauragateiha swaswe andwairþs anþaramma sinþa jah aljaþro nu melja þaim faura frawaurkjandam jah anþaraim allaim þatei jabai qima aftra ni freidja unte kustu sokeiþ þis ïn mis rodjandins xristaus saei ni siukiþ ïn ïzwis ak mahteigs ïst ïn ïzwis · Aþþan jabai ushramiþs was us siukein akei libaiþ us mahtai gudis : |
| 4b-5 | Jah auk siukam ïn ïmma akei libam miþ ïmma us mahtai gudis ïn ïzwis · Ïzwis silbans fragiþ1 sijaidu ïn galaubeinai · Silbans ïzwis kauseiþ · Þauh niu kunnuþ þatei Ïesus xristus ïn ïzwis ïst ïbai aufto ungakusanai sijuþ : |
| 6-9 | Aþþan wenja ei kunneiþ þatei weis ni sijum ungakusanai · Aþþan bidja du Guda ei ni waiht ubilis taujaiþ · Ni ei weis gakusanai þugkjaima ak ei jus þata godo taujaiþ ei weis ungakusanai þugkjaima2 · Ni auk magum ƕa wiþra sunja ak faur sunja · Aþþan faginom þan weis siukam ïþ jus swinþai sijuþ þizuh auk jah bidjam ïzwaraizos ustauhtais : |
| 10 | Duþþe þata aljaþro melja ei andwairþs harduba ni taujau bi waldufnja þammei frauja fragaf mis du gatimreinai jah ni du gataurþai : |
| 11-12a | Þata anþar broþrjus faginoþ · Ustauhanai sijaiþ · Samo fraþjaiþ · Gawairþi taujandans sijaiþ · Jah guþ gawairþeis jah friaþwos wairþiþ miþ ïzwis · Goljaiþ ïzwis misso ïn frijonai weihai : |
| 12b-13 | Goljand ïzwis þai weihans allai Ansts fraujins unsaris Ïesuis xristaus jah friaþwa Gudis jah gaman ahmins weihis miþ allaim ïzwis : Amen |
| 1. | C. Ambrosianus A has a more likely reading fraisiþ, agreeing with most Greek (πειράζετε) and Peshitta (ܐܣܘ). |
| 2. | C. Ambrosianus A: ïþ weis swe ungakusanai þugkjaima. |
