·?· ?aissalauneikaium


Chapter one is not extant, so it is waiting to be translated into Gothic. Latin Wulfilan
	· · ·
?	^{Codex Ambrosianus B based on transcription by Project Wulfila, in turn based on Streitberg (1919). Commercial use limited. Punctuation and extratextual conventions differ from the manuscript.}
1–3
4
5–6
7
8
9
10-12	· · · jah Guþ ƕaiwa weihaba jah garaihtaba jah unfairinodaba ïzwis þaim galaubjandam wesum · Swaswe wituþ ainƕarjanoh ïzwara swe atta barna seina bidjandans ïzwis jah gaþlaihandans jah weitwodjandans du gaggan ïzwis wairþaba Gudis saei laþoda ïzwis du seinai þiudangardjai jah wulþau :
13	Duþe jah weis awiliudom Guda unsweibandans unte nimandans at uns waurd hauseinais Gudis andnemuþ ni swaswe waurd manne ak swaswe ïst sunjaba waurd gudis þatei jah waurkeiþ ïn ïzwis juzei galaubeiþ :
14-16	Jus auk galeikondans waurþuþ broþrjus aikklesjom Gudis þaim wisandeim ïn Ïudaia ïn xristau Ïesu unte þata samo wunnuþ jah jus fram ïzwaraim inkunjam swaswe jah weis fram Ïudaium · þaiei jah fraujin usqemun Ïesua jah swesaim praufetum jah uns frawrekun jah guda ni galeikandans jah allaim mannam andaneiþans sind · Warjandans uns du þiudom rodjan ei ganisaina · Akei du usfulljan seinos frawaurhtins sinteino · Aþþan snauh ana ïns hatis gudis und andi :
17-18	Aþþan weis broþrjus gaainanaidai af ïzwis du mela ƕeilos andwairþja ni hairtin ufarassau sniumidedum andaugi ïzwara gasaiƕan ïn managamma lustau · Unte wildedum qiman at ïzwis ïk raihtis Pawlus jah ainamma sinþa jah twaim jah analatida uns Satana :
19-20	ʘa auk ïst unsara wens aiþþau faheþs aiþþau waips ƕoftuljos niu jus ïn andwairþja fraujins unsaris Ïesuis xristaus ïn ïs quma·· Jus auk siuþ wulþus unsar jah faheþs :
Γ
1-3a	Ïn þizei ju ni usþulandans þanamais galeikaida uns ei biliþanai weseima ïn Aþeinim ainai jah ïnsandidedum Teimauþaiu broþar unsarana jah andbaht Gudis ïn aiwaggeljon Xristaus ei ïzwis gatulgjai jah bidjai bi galaubein ïzwara ei ni ainshun afagjaidau ïn þaim aggwiþom :
3b-5	Silbans auk wituþ þatei du þamma satidai sijum jah auk þan wesum at ïzwis fauraqeþum ïzwis þatei anawairþ was uns du winnan agliþos swaswe jah warþ jah wituþ · Duþþe jah ïk ju ni usþulans ïnsandida du ufkunnan galaubein ïzwara ïbai aufto usfaifraisi ïzwis sa fraisands jah sware wairþai arbaiþs unsara :
6-8	Aþþan nu at qimandin Teimauþaiu at unsis fram ïzwis jah gateihandin uns galaubein [jah] friaþwa ïzwara, jah þatei gaminþi unsar habaiþ god sinteino gairnjandans uns gasaiƕan swaswe jah weis ïzwis · Ïnuh þis gaþrafstidai sijum broþrjus fram ïzwis ana allai nauþai jah aglon unsarai ïn ïzwaraizos galaubeinais · Unte sai libam jabai jus gastandiþ ïn fraujin :
9-10	ʘa auk awiliude magum usgildan fraujin Guda bi ïzwis ana allai fahedai þizaiei faginom ïn ïzwara faura Guda unsaramma naht jah daga ufarassau bidjandans ei gasaiƕaima andwairþja ïzwara jah ustiuhaima waninassu galaubeinais ïzwaraizos··
11-13	Aþþan silba Guþ jah atta unsar jah frauja unsar Ïesus xristus garaihtjai wig unsarana du ïzwis · Aþþan ïzwis frauja managjai jah ganohnan gataujai friaþwai ïn ïzwis misso jah allans swaswe jah weis ïn ïzwis du tulgjan hairtona ïzwara unfairinona ïn weihiþai faura Guda jah attin unsaramma ïn quma fraujins unsaris Ïesuis xristaus miþ allaim þaim weiham seinaim :
?
1-2	þannu nu broþrjus anahaitam bidai ïzwis jah bidjam ïn fraujin Ïesua ei swaswe andnemuþ at uns ƕaiwa skuluþ gaggan jah galeikan guda swaswe jah gaggaiþ jah gaaukaiþ mais · Wituþ auk ƕarjos anabusnins atgebum ïzwis þairh fraujan Ïesu xristu :
3-6	þata auk ïst wilja Gudis · Weihiþa ïzwara ei gahabaiþ ïzwis af kalkinassaus · ?i witi ƕarjizuh ïzwara gastaldan sein kas ïn weihiþai jah sweriþai ni ïn gairunja lustaus swaswe jah þiudos þozei ni kunnun Guþ · Ei ƕas ni ufargaggai nih bi faihu · · · broþar seinana unte fraweitands frauja ïst allaize swaswe jah fauraqeþum ïzwis jah weitwodidedum :
7-8	Unte ni laþoda uns Guþ du unhrainiþai ak ïn weihiþa · Ïnuh þis nu saei ufbrikiþ ni mann ufbrikiþ ak Guda saei gaf ahman seinana weihana ïzwis :
9-12	Aþþan bi broþrulubon ni þaurbum meljan ïzwis unte silbans jus at guda uslaisidai sijuþ du frijon ïzwis misso jah auk taujiþ þata ïn allans broþruns ïn allai Makidonai · Aþþan bidjam ïzyis broþrjus biauknan mais jah biarbaidjan anaqal jah taujan swesa jah waurkjan handum ïzwaraim swaswe jah ïzwis anabudum · Ei gaggaiþ gafehaba du þaim þaiei uta sind jah ni ainishun ƕis þaurbeiþ :
13-14	Aþþan ni wileima ïzwis unweisans broþrjus bi þans anaslepandans ei ni saurgaiþ swe þai anþarai þaiei ni haband wen · Unte jabai galaubjam þatei Ïesus gaswalt jah usstoþ swa jah Guþ þans þaiei anasaislepun þairh Ïesu tiuhaiþ miþ imma :
15-17	þatuþþan ïzwis qiþam ïn waurda fraujins þatei weis þai libandans þai bilaibidans ïn quma fraujins ni bisniwam faur þans anaslepandans · Unte silba frauja ïn haitjai ïn stibnai arkaggilaus jah ïn þuthaurna gudis dalaþ atsteigiþ af himina jah dauþans þai ïn Xristau usstandand faurþis · þaþro þan weis þai libandans þai aflifnandans suns miþ ïmma frawilwanda ïn milhmam du gamotjan fraujin ïn luftau jah framwigis miþ fraujin wairþam :
18	Swaei nu þrafsteiþ ïzwis misso ïn þaim waurdam :
?
1-2	Aþþan bi þo þeihsa jah mela broþrjus ni þaurbum ei ïzwis meljaima · Unte silbans glaggwo wituþ þatei dags fraujins swe þiubs ïn naht swa qimiþ :
3	þan qiþand · Gawairþi jah tulgiþa · þanuh unweniggo ïns biqimiþ fralusts swaswe sair qiþuhafton jah ni unþaþliuhand :
4-5	Aþþan jus broþrjus ni sijuþ ïn riqiza ei sa dags ïzwis swe þiubs gafahai · Unte allai jus sunjus liuhadis sijuþ jah sunjus dagis ni siuþ nahts ni riqizis :
6-8	þannu nu ni slepaima swe þai anþarai ak wakaima jah warai sijaima · Unte þaiei slepand naht slepand jah þaiei drugkanai wairþand nahts drugkanai wairþand · Ïþ weis dagis wisandans usskawai sijaima gahamodai brunjon galaubeinais jah friaþwos jah hilma wenai naseinais :
9-11	Unte ni satida uns Guþ ïn hatis ak du gafreideinai ganistais þairh fraujan unsarana Ïesu xristu saei gaswalt faur uns ei jaþþe slepaima jaþþe wakaima samana miþ ïmma libaima · Ïnuh þis þrafsteiþ ïzwis misso jah timrjaiþ ainƕarjizuh anþar anþarana swaswe jah taujiþ :
12-15	Aþþan bidjam ïzwis broþrjus kunnan þans arbaidjandans ïn ïzwis jah faurstassjans ïzwarans ïn fraujin · Sweraiþ ïns ufarassau ïn friaþwai ïn waurstwis ïze jah gawairþi habaiþ ïn ïzwis · Bidjamuþþan ïzwis broþrjus talzjaiþ þans ungatassans þrafstjaiþ þans grindafraþjans usþulaiþ þans siukans usbeisneigai sijaiþ wiþra allans · Saiƕiþ ïbai ƕas ubil und ubilamma ƕamma usgildai ak sinteino þiuþ laistjaiþ miþ ïzwis misso jah wiþra allans :
16-22	Sinteino faginoþ ïn fraujin · Unsweibandans bidjaiþ · Ïn allamma awiliudoþ · þata auk ïst wilja gudis ïn xristau Ïesu ïn ïzwis · Ahman ni afƕapjaiþ · Praufetjam ni frakunneiþ · Aþþan all uskiusaiþ · þatei god sijai gahabaiþ · Af allamma waihte ubilaizo afhabaiþ ïzwis :
23	Aþþan silba Guþ gawairþjis gaweihai ïzwis allandjo jah gahailana ïzwarana ahman jah saiwala jah leik usfairinona ïn quma fraujins unsaris Ïesuis xristaus gafastaindau :
24	Triggws saei laþoda ïzwis saei jah taujiþ :
25	Broþrjus bidjaiþuþþan jah bi uns :
26	Goljaiþ broþruns allans ïn gafrijonai weihai :
27	Biswara ïzwis ïn fraujin ei ussiggwaidau so aipistaule þaim weiham broþrum :
28	Ansts fraujins unsaris Ïesuis xristaus miþ ïzwis · Amen :

Leave a Reply Cancel reply